95. Geburtstag Max Brühl

Max mit seiner Gattin Gritli

Unser Kiwanisfreund, Max Brühl, konnte kürzlich seinen 95. Geburtstag feiern!
Wir gratulieren dazu ganz herzlich und wünschen ihm weiterhin alles Gute und gute Gesundheit.
Aus Anlass dieses seltenen Festes hat ihm ein Kiwanisfreund nachfolgende Zeilen gewidmet:
 
Em Max zem finfeniiziggschde
 
Liebi Frind, ich muess Eych steere
Und bitte, jetzt mit Schneere z’herre;
Denn trotz däm heerlig feine Aesse
Wän mir doch au nit ganz vergässe
Worum mir in däm scheene Rahme,
laider ohni unseri Dame,
kulinarisch schwelge dien,
bis dass mir denn go schaffe mien!
 
Do sitzt unsere Jubilar,
dr Max, dr Kiwanissuperstar!
Finfeniinzig und so zwäg
Wie ich in mine beschte Dääg!
Nur laider, und das isch jo s’Dumme,
sin die bi mir scho länger umme!
 
Dr Max, dä isch, s’macht aim fascht muff,
je älter desto besser druff!
Aer het e Hut, fascht wie e Buschi,
 das kunnt dängg vo dr kalte Duschi,
wo är e jede Morge nimmt,
nai ohni Sprüch, gäll Max, das stimmt!
 
Und denne macht är täglig stramm
Am Morge sy gross Turnprogramm!
Kuum us em Bett git’s Liegestitz,
das hilft aim gege Weh am Kriz;
denn git’s Kniebeuge, s’isch gewaltig,
drum het dr Max die gueti Haltig!
Denn Saili Gumpe und zem Schluss,
jä ich waiss scho, dr Max kunnt druss,
git’s dehne und dr Kerper stregge,
was maine Ihr, ich wurd verregge;
doch dr Max, dä leggt sich so an Lade,
trainiert är ächtsch fir d’Olympiade?
Ehrlig gsait, ich fänd’s nit gsteehrt,
doch dr Eltischt, Max, dä wärsch au dert!
 
Dä bisch jo Du bi uns scho lang
Und ich dängg, vo uns hän vyyl dr Drang,
wie Du so kenne älter z’wärde,
denn was git’s Scheeners uf däre Aerde
als so wie Du gsund derfe z’sy,
und s’gniesse bimene Gleesli Wy,
so wie hit mit Frinde zämme z’aesse,
solang sie dy Dessert nit vergässe!
Und vor allem kenne s’Lääbe gniesse
Und scho so lang wie Du nimm schaffe z’miesse!
Kenntisch nit, bimene Gleesli Rote
Uns Frinde do, s’Rezäpt verroote?
 
Nai loosed jetzt, Ihr wärded’s gseeh,
dr Max wird sage, s’sch mi Eh,
das Joohr wärdes siebzig Joohr,
em Max kunnt’s dängg no länger vor!
Und gäll Max, s’isch nit ybertriibe,
bisch em Grithli immer ganz treu bliibe!
Und waisch, my liebe Max, ich dängg,
es isch halt scho e bsunder Gschängg,
wenn me so lang ka zämme sy
drum hoff ich au , dass s’Grithli gly
wieder zue Dir ka haime ko,
ich dängg, mir alli wäre froh
und hebe Dir ganz fescht dr Duume,
dass sie’s Spitalzimmer gly ka ruume!
 
Also Max, mir winsche s’Bescht
Zem hittige Geburtsdaagsfescht!
Mir winsche vyyli frohi Stunde
Fir die näggschti Lääbensrunde!
Zem dr alti Heesters schloh,
muesch no wyteri 10 Joohr yberstoh!
Und ehrlig gsait, ich wurdi maine,
do inn, do zwiiflet do dra kaine!
 
In däm Sinn nimm ich s’ Glas in d’Hand,
uf Dy Wohl, Max, und Proscht mitnand!